أخيراً قررت هيئة مكافحة الفساد ان شحنة العجول الكولومبية سليمة وبحالة صحية جيدة ولا وجود لأية أعراض أو أمراض وبائية بما فيها مرض التهاب الفم الحويصلي اللعين ، وان اللجنة الفنية التي كشفت عليها والمكونة من عشرة أطباء بيطريين أوصت بإنزال حمولة الباخرة والبالغة 6600عجل وإدخال حمولتها إلى أراضي المملكة بسلام:
- الطبيب البيطري: شو الاسم؟
- العجل: عجل بن ثور الكولومبي..
- الطبيب: العمر؟
- العجل: 6 سنين...
- الطبيب: معك سكري؟
- العجل: لا
- الطبيب: ضغط؟
- العجل: لا ؟
- الطبيب: التهاب مسالك!.
- العجل: لا ...
- الطبيب: عامل قسطرات؟
- العجل: لا الحمد لله ..
- الطبيب: مركّب شبكات؟
- العجل: ولا شبكات ..
- الطبيب: بتشعر بتعب يوم تمشي..؟
- العجل: لا ..بس أحياناً بالطلوع بتعب شوي ..!
- الطبيب: طيب عمره صار معك التهاب الفم الحويصلي وأنت زغير..!.
- العجل: مش خابر !.
- الطبيب البيطري : عمرك رشّحت؟ عطست؟ قحّيت قحّة ناشفة..
- العجل: قليل بالشتوية زي باقي هالعجول..
- الطبيب: كم واحد انتو؟
- العجل: 6600 عجل ..
- الطبيب: حدا من جماعتك معه أمراض مزمنة ..أمراض معدية..!
- العجل: لا فيش حدا ...كلهم شباب ..وصحتهم ممتازة.
- الطبيب: لأيش بدكوا شهادة خلو الأمراض!!.
- العجل: عشان عقود العمل ..
- الطبيب: يعني شغلة روتينية...
- العجل: آه والله ..
- الطبيب وهو يضع الاختام على الشهادة : الله معك..هاي الورقة الك وللشباب
- العجل: بتأمرنا شي ...
- الطبيب: سلامتك...ع المحاسب ... و سلم عالوالد...
- العجل لباقي العجول من على ظهر الباخرة: «شباب ادخلوها آمنين»..
احمد حسن الزعبي
الرأي
