وكالة كل العرب الاخبارية

بهذه الكلمات سيدخل الاعداء الصهاينه على الكونجرس الامريكي دخالت عرب حتى ( يفكوهم ) من شر مجلس النواب الاردني .اللي امهل الحكومه حتى يوم الثلاثاء لطرد السفير . طبعا الاعداء الصهاينه جلو من فلسطين عند شيوخ كوريا الجنوبيه هربا من سخط وغضب نواب العبدلي الذين اخذوا على انفسهم عهدا ان لا يلبسوا العقال ولا يقعدوا مع الرجال اذا ما طردوا السفير الصهيوني ولعنوا فاطس جدوده. 

يوم الثلاث رح نبني صيوانات قدام المجلس عشان نستقبل جاهه من اكبر شيوخ اوروبا جايين يوخذوا عطوة اعتراف ها لعاد ؟ هذا ما حدث بعد ان قبعت السالفه مع مجلس نوابنا ويكفيك شر النواب لما تقبع معاهم .

يوم الثلاثاء موعدنا مع الرد العاصف والضربه القاصمه للعدو الصهيوني حيث سيلبس النواب بدلة فوتيك ويلوحون بالشباري وتعلو اصواتهم يا ويلك ياللي تعادينا يا ويلك ويييييل....

نعم لقد شفت كل هالهكي بالمنام وخير اللهم اجعلو خير شفت الشعب قاعد يحجز بالنواب (بتشديد الجيم) . والنواب نارهم قاطبه وراسهم والف سيف الا يشربوا من دم السفير .

لقد قامت الدنيا بالعبدلي وما قعدت والمشهد مرعب والدماء تغلي وثمة نائب قاعد يتفلت من بين الناس ويصرخ... دشروني.... ولكوا دشروني عيب علي العيشه هان والقعده عكرسي البرلمان ان ما اخذت بثارك يا قاضي صلح عمان . 
و المجلس زي بركان حتى النواب الطنطات قاعدين يصرخوا (رح نعملكن ئتله يا أسيين) عادي مش مهم . المهم انو دمهم تحرك ومشاعرهم هبرجت ودنت ساعة الاحتلال . 
من جهته السفير الصهيوني تمنى الارض تنشق وتبلعوا .. كل شوي يقول يا ويلي ولكوا هظول نواب الاردن مش حيالله ....ولكوا رحت بشربت مي ولكوا وقعت وما حد سمى علي .... شو بدكوا بطولة السالفه . المجلس مثل النار والعالم عكف عفريت يترقب الاحداث لحظه بلحظه والصهاينه قاعدين يلاخموا ومجلس الامن نشف ريقوا ومش قادر يهدي الوضع بالعبدلي . ويوم الثلاثاء هو الحاسم . ....
معلش اخواني خليني احلم ما دام ان الحلم ما زال مجاني خلوني احلم . 
عالاقل بالحلم بتحس انو بعدنا عنا كرامه ونخوة .